18 Jul Maridaxe showcooking na Feira do Viño do Rosal con selo de Eurural
O chef galego Iván Méndez estivo tras os fogóns mentres que os sumillers Luis e Alejandro Paadín maridaron os pratos cos caldos rosaleiros
A Asociación de Desenvolvemento Galicia Suroeste Eurural achegou o seu gran de area á XXVIII Feira do Viño do Rosal, a edición máis especial e distinta das vividas ata o de agora, unha feira cunha programación virtual deseñada para chegar a todos os recunchos do territorio pero coidando da saúde de todas as persoas. Eurural colaborou cunha das actividades máis suculentas da Feira: unha maridaxe showcooking na que casar deliciosos pratos feitos con produtos galegos cos caldos rosaleiros.
O chef Iván Méndez preparou primeiro, segundo e terceiro prato mentres os sumilleres Luis e Alejandro Paadín detallaban os viños máis acaídos para estes manxares. Tres grandes mestres tras os fogóns e na cociña nun escenario único como foi as adegas Altos de Torona.
Tempura de albariño, mexillón de Galicia e zamburiñas teriyaky para abrir boca; filloas de zorza, queixo San Simón e pementos de Padrón para continuar e un delicioso arroz cremoso de gambones, berberechos e alga Codium para rematar foi o menú proposto polo chef galego.
Esta actividade enmárcase dentro da iniciativa de animación e difusión realizadas por Eurural ao abeiro do programa Leader 2014-2020 que conta coa co-financiación da Axencia Galega de Desenvolvemento Rural (Agader) e do Ministerio de Agricultura, Pesca y Alimentación. Trátase dunha das accións levadas a cabo para potenciar o produto local.